Skoða kort

Aðstaða og nánasta umhverfi

Útsýni er mjög mikið frá Þjórsárveri og er fjallahringurinn líklega hvergi á Íslandi víðari og meiri. Hann nær frá Selvogsheiði með Skálafell hæst í vestri, og norður og austur um og talsvert til suðurs með Eyjafjallajökul og Seljalandsmúlann syðst. Vestmannaeyjar ber svo við sjónarrönd enn sunnar. Í vestur og norður sést m.a. til Botnsúlna, Búrfells í Grímsnesi, Kálfstinda og Vörðufells. Í góðu skyggni sést alla leið inn að Bláfelli. Í austur sést m.a. til Heklu, Tindafjallajökuls og Þríhyrnings. Vestan við Þjórsárver er Villingaholtsvatn, lítið og snoturt stöðuvatn. Handan við það sér heim að bæjarhverfunum Vatnsenda og Vatnsholti. Þar suður af er Kolsholtshverfið. Í norðaustri, upp með Þjórsá sér heim að Egilsstaðahverfi og í suðaustri, niður með Þjórsá sést til bæjanna Syðri-Grófar, Mjósyndis, Forsætishverfis og Ferjuness syðst. Við Ferjunes og Egilsstaði voru áður ferjur á Þjórsá.

Nánasta umhverfi:
Eins og áður sagði stendur Þjórsárver hæst á Villingaholti á snyrtilegri afgirtri lóð. Á sömu lóð er Flóaskóli, sem er grunnskóli Flóahrepps og þar af leiðandi töluvert af útileiktækjum fyrir born á öllum aldri einnig er sparkvöllur á lóðinni. Auk hinnar góðu tjaldaðstöðu og leikaðsvæðis Þjórsárvers er hér myndarleg íþróttaaðstaða Ungmennafélagsins Vöku. Vaka veitir gestum Þjórsárvers góðfúslegt leyfi fyrir notkun íþróttaaðstöðunnar utan æfingartíma, ef vel er um hana gengið. Nánari lýsingu á skipulagi innan lóðarinnar og húskynnum í Þjórsárveri má sjá á síðunni: um Þjórsárver.
Stutt frá Þjórsárveri er hin fagra Villingaholtskirkja. Hjá Þjórsárveri er útsýnisaðstaða með teikningum á skiltum sem sýna nöfn á því helsta sem fyrir augu ber í hinu víðfeðma útsýni.

Við tjaldstæðið er salernis og sturtu aðstaða öll til fyrirmyndar. Þvottavél með sjálfsala er einnig á staðnum. Frábær leik aðstaða fyrir börn. Stutt er í Ferðaþjónustuna Vatnsholti www.hotelvatnsholt.is þar sem er opin veitingastaður öll kvöld frá kl. 18-21. Hestaleiga, bátaleiga og dýragarður er í Vatnsholti.

Sjá kort með hagnýtum upplýsingum.

Nánari upplýsingar í síma : 8997748